Bluesky: ఎక్స్ యూజర్లు బ్లూస్కైకి ఎందుకు మారుతున్నారు, ఈ కొత్త సోషల్ మీడియా కంపెనీ ఎవరిది

”సోషల్ మీడియా అంటే ఇలా ఉండాలి” అని బ్లూస్కై తనను తాను అభివర్ణించుకున్నప్పటికీ, ఇది ఇతర ప్లాట్‌ఫాంల మాదిరిగానే కనిపిస్తుంది.

ఈ సైట్ చూసినప్పుడు, పేజీకి ఎడమవైపు ఉన్న బార్‌లో సెర్చ్, నోటిఫికేషన్స్, హోం పేజీ వంటి మొదలైన ఆప్షన్లు కనిపిస్తాయి.

ఈ సోషల్ మీడియా ఖాతాను వినియోగించే వారు తమకు ఇష్టమైన పోస్టులు చేయొచ్చు, కామెంట్లు చేయొచ్చు, రీపోస్టు చేయొచ్చు, లేదంటే ఇతరులు పోస్టు చేసిన వాటిని లైక్ చేయొచ్చు.

మామూలుగా చెప్పాలంటే, గతంలో ట్విటర్ ఎలా ఉండేదో అలాగే ఇది కూడా పనిచేస్తుంది.

అయితే, వాటితో బ్లూస్కైకి ఉన్న ప్రధాన తేడా ఏంటంటే డీసెంట్రలైజ్డ్.

అంటే, వినియోగదారులు తమ డేటాను కంపెనీకి చెందిన సర్వర్లలోనే కాకుండా, ఇతర సర్వర్లలోనూ భద్రపరుచుకునే అవకాశం ఉండడం.

అంటే, బ్లూస్కై వినియోగదారులు కేవలం తమ బ్లూస్కై అకౌంట్‌తో మాత్రమే కాకుండా, తమ సొంత అకౌంట్ ద్వారా కూడా లాగిన్ అవ్వొచ్చు.

అయితే, చాలామంది వ్యక్తులు తమ సొంత అకౌంట్‌తో లాగిన్ చేసేందుకు ఇష్టపడరు. కొత్తగా బ్లూస్కైలో చేరిన వారి యూజర్ నేమ్ చివరన ”.bsky.social” అని రావడం కూడా మిగతావాటి కంటే భిన్నంగా ఉంది.

ఇదేంటి అచ్చం ‘ఎక్స్‌’లానే ఉందని అనిపించినా, అలా ఎందుకో తెలిస్తే పెద్దగా ఆశ్చర్యం కలగదు.

ట్విటర్ మాజీ హెడ్ జాక్ డోర్సీ దీన్ని రూపొందించారు.

దీనిని ట్విటర్‌కు డీసెంట్రలైజ్‌డ్ వెర్షన్‌‌గా తీసుకురావాలని, ఏ ఒక్క వ్యక్తి లేదా సంస్థ సొంతం చేసుకోలేని విధంగా ఇది ఉండాలని కోరుకుంటున్నట్లు గతంలో డోర్సీ చెప్పారు.

2024 మేలో డోర్సీ బ్లూస్కై బోర్డు నుంచి వైదొలిగారు, ఆ జట్టులోనూ ఇప్పుడాయన లేరు. సెప్టెంబర్‌లో తన అకౌంట్‌ను రద్దు కూడా చేశారు.

ఇప్పుడు ఈ సంస్థ అమెరికా పబ్లిక్ బెనిఫిట్ కార్పొరేషన్ ఎగ్జిక్యూటివ్ జే గ్రాబెర్ సారథ్యంలో నడుస్తోంది.

2019 నుంచి బ్లూస్కై అందుబాటులో ఉంది. అయితే, ఇది ఈ ఏడాది ఫిబ్రవరి వరకు ఇన్విటేషన్ ఓన్లీ (ఆహ్వానం ఉన్నవారికే) అప్లికేషన్‌గా మాత్రమే ఉండేది.

దీనిని విస్తృతంగా వినియోగదారులకు అందుబాటులోకి తీసుకురావడానికి ముందు డెవలపర్లు అన్ని విధాలుగా అభివృద్ధి చేశారు.

ఈ ప్లాన్ కొంతవరకూ పనిచేసింది, కానీ నవంబర్‌ నుంచే కొత్త యూజర్ల కోలాహలం మొదలైంది.

ఇదేమీ యాదృచ్ఛికంగా జరిగింది కాదు, నవంబర్‌లో జరిగిన అమెరికా ఎన్నికల్లో డోనల్డ్ ట్రంప్ విజయం సాధించిన తర్వాత బ్లూస్కై వినియోగదారుల సంఖ్య పెరగడం ప్రారంభమైంది.

ఎక్స్ యాజమాని ఎలాన్ మస్క్ అమెరికా ఎన్నికల ప్రచారంలో ట్రంప్‌కు మద్దతుగా ఉన్నారు. ట్రంప్ పాలనాపరమైన వ్యవహారాల్లోనూ భాగస్వాములవుతున్నారు.

దీంతో ఇది రాజకీయంగా విభజనకు దారితీసి, చాలామంది తమ నిరసనను తెలియజేసేందుకు ఎక్స్‌ను వీడుతున్నారు.

అయితే, మరికొందరు పలు ఇతర కారణాలు చూపారు. ఎక్స్ ”ఒక టాక్సిక్ మీడియా ప్లాట్‌ఫాం” అని ఆరోపిస్తూ వార్తాపత్రిక గార్డియన్ ఎక్స్‌లో పోస్టులు చేయడం నిలిపేసింది.

అదే సమయంలో, ప్రపంచవ్యాప్తంగా భారీ స్థాయిలో వినియోగదారులు బ్లూస్కై యాప్‌ను డౌన్‌లోడ్ చేసుకుంటున్నారు.

యూకేలో గత గురువారం యాపిల్ ప్లే స్టోర్‌ నుంచి డౌన్‌లోడ్ అయిన యాప్‌లలో ఇది టాప్‌‌లో నిలిచింది.

పాప్ సింగర్ లిజ్జో నుంచి టాస్క్‌మాస్టర్ గ్రెగ్ డెవీస్ వరకూ చాలామంది ప్రముఖులు ఈ ప్లాట్‌ఫాంలో చేరుతున్నట్లు చెప్పడంతో పాటు ఎక్స్‌ని దాదాపుగా వదిలేస్తున్నట్లు ప్రకటించారు.

అలాంటి వారిలో బెన్ స్టిల్లర్, జామీ లీ కర్టిస్, పాటన్ ఓస్వాల్ట్ వంటి వారున్నారు.

తన ప్రత్యర్థిని సవాల్ చేయడంలో బ్లూస్కైకి ఈ పెరుగుదల కీలకమే అయినప్పటికీ, ఇది స్థిరంగా కొనసాగాల్సి ఉంటుంది.

ఎక్స్ తన వినియోగదారుల సంఖ్యను కచ్చితంగా చెప్పకపోయినప్పటికీ, కోట్లాది మంది యూజర్లు ఉన్నారు. ప్రతిరోజూ దాదాపు 25 కోట్ల మంది ఎక్స్ వినియోగిస్తున్నారని గతంలో ఒకసారి ఎలాన్ మస్క్ చెప్పారు.

ఇదే మిలియన్ డాలర్ల ప్రశ్న.

పెట్టుబడిదారులు, ఇతర సంస్థల నుంచి సేకరించిన నిధులతో బ్లూస్కై ప్రారంభమైంది. దాదాపు కోటి డాలర్లను ఈ సంస్థ సేకరించింది.

భారీసంఖ్యలో వినియోగదారులు చేరుతున్న ఈ సమయంలో, బిల్లుల చెల్లింపులకు ఒక మార్గాన్ని అన్వేషించాల్సి ఉంటుంది.

గతంలో ట్విటర్‌కు వచ్చే ఆదాయంలో ఎక్కువ భాగం ప్రకటనల ద్వారానే వచ్చేది.

కానీ, ఈ పరిస్థితిని వద్దనుకుంటున్నట్లు బ్లూస్కై తెలిపింది. వినియోగదారులు తమకు ఇష్టమైన డొమైన్ పేరుతో కొనసాగేందుకు చెల్లింపులు చేసేందుకు పెద్దగా ఆలోచించరని పేర్కొంది.

ఇది సంక్లిష్టంగా అనిపించినప్పటికీ, ప్రాథమికంగా ప్రతి ఒక్క వినియోగదారుకి తనకిష్టమైన పేరుతో ఖాతాను కొనసాగించే అవకాశం ఉంటుంది.

ఉదాహరణకు, నా యూజర్ నేమ్ @twgerken.bsky.social, భవిష్యత్తులో అది @twgerken.bbc.co.ukగా అధికారికంగా మారొచ్చు.

అయితే, అందుకు సదరు సంస్థ అప్రూవ్ చేయాల్సి ఉంటుందని, దీనిద్వారా వినియోగదారుని ధ్రువీకరణ కూడా రెట్టింపవుతుందని వారు చెబుతున్నారు.

బ్లూస్కై యాజమాన్యం ప్రకటనలను అనుమతించని పక్షంలో, సబ్‌స్క్రిప్షన్ వంటి ఇతర ఆప్షన్లపై దృష్టిపెట్టడం అనివార్యమవుతుంది.

అలాంటి వాటి ద్వారా భారీ ఆదాయార్జన జరగాలి, టెక్ స్టార్టప్‌లకు అది అసాధ్యమైతే కాదు.